Mission Sunday Message

 

 VIXV DHORM-PORGOTTNNECHEA AYTARAK

BHAGEVONT BAP FRANCIS-ACHO SONDEX

20 Otumbr 2013

Mogall Bhava-bhoinninom,

 Hea vorsa ami Vixv Dhorm-Porgottnnecho Dis somarombhtana Bhavarthachem Voros sompta. Hem voros, Somya koddem amchi ixttagot ghott korunk ani kalljidarponnan Xubh-Vortoman porgott’ttole Povitr Sobhe bhaxen, amchi yatra korunk ek mhotvachi sondhi. Heach sondorbhan, hanv thoddim kolponam manddunk sodtam.

1. Bhavarth amkam Devachem moladik dennem. Hoch bhavarth, Tacho mog korunk ani Taka vollkhunk amchim monam ukti korta. Amchem jivit orthabhorit, uncha molachem ani odik sundor korunk, To amchea sombondhan bhitor sorunk sodta ani apleach jivitant amkam bhagidaram zaunk apoyta. Dev amcho mog korta! Bhavarth, kosoy zalear ami apnnaunk zay, mhollear amcho khasgi zobab Taka zay, ani amkanch Deva svadin korunk, Tacho mog jiyeunk ani Tachea ogonnit kakllutti khatir upkari zaunk, kalljidarponn zay. Bhavarth mhollear ek dan, thoddeankuch samballun dovorlolem nhoy punn udarponnan bhettoylolem. Dev mhollear soddvonnecho anond ani Hoch Dev amcho mog korta mhonn dor eklean onnbhovunk zay. Tem ek dan, hem dan mon’xan svotakuch dovrunk zayna punn tem vanttunk zay. Ami tem amkanch dovrunk chintlem zalear, ami eksurim, vanz ani nirxel’lim kristanvam zatoleanv. Bori-Khobor porgottop, Kristachea xisponnacho ek bhag ani Povitr Sobhechem akh’khem jivit jivall korpi ek nirontor nixtta (commitment). “Dhorm-Porgottnnechea adarak pavop mhollear Povitr Sobheche somuday vikasit zal’leachi ek khunna.”  (BENEDICT XVI, Verbum Domini, 95). Dor ek somuday jen’na bhavarth ucharta, sevadhorma vellar to khuxalkayen somarombhta, mog jiyeta, xevott nastana Devachem Utor porgott’tta, poyxil’lea vattharak, odik korun Kristak ozun vollkhunk pavunk nant, tanche khatir aplench jivit khorchita, ten’na tea-tea somudayachi puray vadd zalea mhonnom yeta. Khasgi ani somudayik panvddea velem amchea bhavarthachem bollgem, ho bhavarth dusreank kollit korpache, bhavarth mogan jiyeunche ani ximpddaunche, amkam bhett’ttoleam sovem tachi govayki diunche ani amche borobor jivitacho marog vanttche  tanki promann mezum yeta!

2. Vatican II Vixv Sobhe-che survatek pon’nas vorsam bhorlea uprant, Bhavarthachem Voros Povitr Sobhek somokalin (contemporary) jogant tichea asnneachi, novsorlole zagrutaye dixen ut’tejon dita. Dhorm-Porgottnnecho vavr mhollear nhoy fokot bhugolik vatthar, punn lok, tanchi sonskrutay ani dor ek vyokti, karonn bhavarth-acheo ‘ximo’ suvantank ani monis poromporekuch nhoy, punn dor eka dadlea-baylechem kalliz par korta. Vatican II Vixv Sobhen, kheritponnim bhor ghalun koxe bhaxen Dhorm-Porgottnnecho vavr, mhollear bhavarthacheo ximo rundavpacho vavr, Povitr Snan ghetlolea dor eka vyokticho ani sogllea Kristi somudayancho vavr mhonn spoxtt kelem. Karonn, Devachi porza somudayant jiyeta, odik korun,  dhormprantant, firgozanim ani koxe-i bhaxen tatunt ti dixtti poddtta. Ani sogllea raxttram mukhar, Kristak govayki diunk tancheruch adaril’lem asam. (Ad Gentes, 37) Teach khatir, dor eka somudayak proxnn manddla ani Jezun xisank dil’lo adex aploch korunk ulo marla. Ho adex mhollear “Jeruzaleant, akh’khea Judeyant ani samarient ani sonvsarachea ximam poryan tache govay zayat.” Ho Kristi jivitacho sohayak (secondary) bhag koso nhoy, punn ek mukh’khi bhag koso amchea bhavam-bhoinni borobor, Kristant amcho bhavarth pogottunk ani govay diunk ani Xubh-Sondexache amkanch porgottnnar korunk, sonvsarachi vatt cholunk amkam apoyleant. Akh’khe porje mukhar ani raxttra mukhar Kristak govayki diunchem mon aspavlea xivay, xisanchi nixtta purnn zaunk zayna. Hachi somzonni diunk, ani gonvllik karyavollinim ani akarannent, hea Dhorm-Porgottnnechea avatthak khaxeli suvat diunk, Hanv Bispank, Padrink, Mottvaxeank, Gonvllik sobhank, dor ekleak ani firgozanim zobabdar aslolea zomeank ulo martam.

3.  Xubh-Vortoman porgottnnechea vavrak pavla konn-konnim addkholleo uprastat, bhayleoch nhoi, punn povitr sobhechea somudayant (bhitorleo) legit. Kaym pavttim, Kristacho Sondex porgottunk ani amchea kallavelea lokank Tachem dorxon diunche khatir tankam adar diunk, amchi urba, anond, kalljidarponn ani bhorvanso unno poddtta. Kaym pavttim, Xubh-Sondexachim sotam porgottop mhollear, meklleponnacher addkholl mhonn ozun somoz asa. Paul VI he baptint orthpurnntayen uloyta: “Amchea bhav-bhoinninchea mona add kitem-i thapop mhollear, ek chuk zaum yeta. Punn tanchea mona mukhar purnn spoxttotayen ani tannim dakhoyl’lea aytea monak puray man diun, Xubh-Sondexachim sotam ani Jezu Kristant soddvonn asa mhonn manddop mhollear hea meklleponnak man divop” (Evangelii Nuntiandi, 80). Kristachem dorxon mellounk amkam sodanch dhir ani suchovpachi umed asunk zay ani ami Tachea Xubh-Sondexache porgottnnnar zaunk zay. Amkam taronnachi vatt dakhounk Jezu amche modem aylo ani tem sonvsarachea ximam poryan kollovpachem karya, amchea hatant ghalem. Zaite pavttim zhuzam, fotti ani chuki hancher bhor ghal’lo ani suchoyl’leo ami polletanv. Povitr Sobhe bhitor legit Xubh-Vortomanachea boreponnak govay diunk ani porgottunk amchea kallant ek gorjechi vost vo gozal. Karonn hea sondorbhan mhotvachem mhollear dor eka Xubh-Vortomankaran mukh’khi totv kodich visorchem nhoy; Povitr Sobhe vinnem, konnech Kristak porgottunk zayna! Xubh-vortoman porgottpacho vavr eklea eksureacho vo khasgi karya nhoy; tem sodanch Povitr Sobhechem. Paul VIvean oxem boroilam; “Ek onvollkhi provochonkar, sondexkar vo gonvlli, Xubh-Vortoman porgott’tta ten’na, lhan somudayank ektthayta, sonvskar dita, ani ekloch, Povitr Sobhechem karyam fuddem vhorta.” “Apnnakuch lagtolea dhorm-porgottnneche zobabdarek lagun vo khasgi prernnek lagun, to vavr korina, punn Povitr-Sobhechea karya borobor ekvottun ani tichea nanvan to vavurta” (ibid.60). Ani hem dhorm-porgottnnechea vavrak boll dita ani dor eka dhorm-porgottnnarak ani Xubh-Vortomankarak eksurponn nhoy, bogor Povitr-Atmean jivall kel’le ekech kuddicho sandho mhonn onnbhov dita.

4. Amchea kallant novea sadhonam vorvim posorlolea somporkachea suvidhananim (fascilities) lokak, gineanak ani onnbhovak ektthaym haddleat. Dhondeak lagun akh’khe ghorabech eka khonddant thaun dusrea khonddant  stholantor (transfer) zaleat, vevharik ani sonskrutik adol-bodol, poryotton ani her sorv bhonvtonnchem vatavoronn legit lokachea bodlpant bhor ghalta. Hea karonnak lagun, firgojechea somudayant, konn tatpurto ani konn sodam khatir ravta, hachem bhan dovorpak kotthin zata. Choddan-chodd, poromporik Kristi vattharanim, bhavarthak sarkech onnvollkhi axil’leancho vo dhormik nodrechi beporva korpi vo her xrodh’dhanchea bollar jiyetoleancho ankddo vaddla. Heach  karonnak lagun thodde Povitr-snan xevlole Kristanv bhavartha add vetole jinne pod’dotiche poryay vinchun kaddttat ani haka lagun, “novem Xubh-Vortoman porgottnnechi” goroz utpon’n zata. Hea sogott ghoddnneank anink ek sot zoddlam, tem mhollear, monis kullache vhodd sonkhek ozun, Jezu Kristachi Bori Khobor pavunk nam. Ami-i jinnechea veg-vegllea pavddeancher, lagu zavpi kotthinayanchea kallant jiyetanv, nhoych fokot arthik, duddvanchim, jevnnache suxitaychim vo poryavoronnachim zhuzam, punn jivitachea khol ortha koddem sombodit axil’lim ani tim utpon’n korpi mukh’khi totvam. Mon’xachem soho-zogop (coexistence) legit, bharan ani proxnnanim bhorlolem asam. He proxnn osuxiktay ani sthir xanti koddem pavoytolea, nitt margache sodik kotthinayo ubeo kortat. Atanchea ani fuddarachea margancheo ximo kallea kumpanim sonkottayleat. He klixtt (complex) ani kotthin poristhitint ani sogllea vastovik (real) poristhitinim, Kristachem Xubh-Vortoman porgottpachi goroz asa.  Ani hem Xubh-Vortoman mhollear bhorvonxeacho, bhogsonneacho, ekvottacho sondex ani Devachea lagxil’lea-ponnachi, Tache kaklluttichi, Tachea taronnachi porgottnni; Devachea mogachi xeokti sogllea vaytt kallokhacher zoit vhorunk xeokta ani boreponnachea margar amkam ghalunk pavta mhonn pogottnni. Amchea kallar moniskullak, ticho marog uzvaddaytolo, suxixit uzvadd zay ani ho uzvadd fokt Kristache bhette vorvim mellum yeta. Bhavarthan dil’lo bhorvanso, amche govayke vorvim, mogan ami hea sonvsarant haddum-ya. Povitr-Sobhechem karya dhormantor korop nhoy, punn marog uzvaddaytoli, mog ani bhorvanso haddttoli jivitachi govayki. Portun anink ek pavtt sangtam Firgoz mhollear adarachi songottnna (organization), dhondo cholovpi vo NGO nhoy punn, Povitr Atmean bhorlolo lokancho somuday. Ho somuday Jezu Kristache bhettechem ochoryo jiyeli ani jiyeta ani hoch khol anondacho onnbhov, Somyan dil’lo taronnacho sondex, to vanttunk sodta. Ani hem korunk Povitr-Atmo, Povitr-Sobhek marg-dorxon dita.

5. Kristache bore khobreche samballnnar zaunk hanv soglleank ut’tejon (encouragement) diunk sodtam. Ani kherit bhaxen  Dhorm-Porgottnnaranche, Fidei Domum padrinche, dhormik dadlea-baylam ani choddan-chodd sonkhen loukik bhavartheanche hanv upkar atthoitam. Somyachem apovnnem svikarun, veg-vegllea sonskrutank ani suvatank Xubh-Vortoman vanttunk, aplo des-ganv, ghor-bhatt soddlem. Toxench novea torunn firgozankui hanv mhotv diunk sodta, Sonkoxttant aslolea firgozank, dhorm-porgottnnar dhaddun, aytea monan teo vantto ghetat. He vorvim, bhorvanso divpi ani jivit novsorpi, tancho bhavarth jiyeunk, urba ani noveponn haddtta. Hea sorv-vyapok  (universal) noveponnan jiyeunk ani “vochat ani sogllea raxttrank mhoje xis korat” (Mt. 28, 19) hea Jezuchea adexak protisad (response) divop mhollear dor eke firgojek, somudayak ek girestkay, karonn dhorm-porgottnnar dhaddop mhollear luksonn nhoi punn faydo. Soglleank apovnno onnbhovtoleank. Jivitachea tumchea bhesa pormonnnem, Povitr Atmeak aytea monan zap diunk hanv ulo martam. Somya koddem aytim zaunk bhiyenakat. Bisp-Saybank, dhormik ghorabeank, somudayank ani sogllea Kristi zomeank, kholayen ani fuddli dixa apnnavun, Ad-Gentes dhorm-porgottnnechea apovnneak sohokar diunk ani Kristi somudayank ghott korunk, padrinchi, dhormikanchi ani loukikanchi goroz aslolea, firgozank adar korunk hanv ulo marta. Ani tea Bispanche sobhek (Episcopal Conference) vo vatharak lagu zavpi firgozam-i modem hi zagrutay asunk zay, karonn apovnneanim chodd girest asloleo firgozo, unneponn onnbhovtolea firgozank chodd aytea monan adar ditat, hem mhotvachem.

Dhorm-Porgottnnarank, bhov korun ‘fidei donum’ padrink ani lovkikank hanv ulo martam. Tumkam patthoilolea firgozanim, khuxalkayen tumchi moladik seva diyat ani Paulu ani Barnabasacho ugddas korun, apli poylich dhorm-porgottnnechi yatra sompoytoch “apnna vorvim Devan kelem titleachi-i khobor tankam dili, ani koxe bhaxen videxiank tannem bhavarthachem dar ugoddlem, tem bi tankam sanglem.” (D.I.14:27) ji khuxalkay tankam bhogli, tich khuxalkay ani onnbhov tea-tea firgozantlean yetolea firgozank haddat. Torunn firgozanchem noveponn haddunk teo ek vatt zaunk xoktat, eke bhaxechi bhavarthachi “portovnni” te vorvim purvil’lea firgozanim, bhavarth vanttpachi urba ani divpa-ghevpacho anond portun utpon’n zaum. Dusrea utranim Somyacho marog apnnavpache yatrent eka-mekache girestkayen vaddop.

Aplea her bhavam bispam borobor, Romachea Bisp-Saybacho sogllea firgozam sovem husko mhollear, Pontifical Missionary Sonstha chalik lavpant mhotvachi nixtta (Commitment). Akh’khe Devache porjechi, khol dhorm-porgottnneche akarnnechi, goroz asa mhonn ugddas korun ani sonvsarant Xubh-Vortoman ximpddaunk dhir diunchea vavrant tancho adar diunk, Kristi somudayanchi somjikaiechi tank posun, dor eka povitr snan ghetlolea kristanvachem ani dor eka somudayachem Dhorm-porgottnnechem mon kholaunk ani jivall korunk hea sonsthancho vavr.

Xevottak, monis-dorjean jiyevpache hok’k vollkhun gheunk ani ukteponnim bhavarthak govay diunk kotthinayo aslolea, veg-vegllea sonvsarachea bhaganim vostolea kristanvank, ek kolpon. Tim amchim bhava-bhoinni kalljidar govay – poylea xenkddeantleam amchea rogt-sakxeam poros sonkhen chodd. Zaytea toranche adhunik pidda-piddek te, xisanche sonsnikaye vorvim fuddo korunk pavle. Kaym thodde zann, Kristache bore khobrek visvaxi ravunk aplo jiv pasun sonkottant ghaltat. Zhogddim-zhuzam sonstolea zonn ekleak, ghorabeak ani somudayank mhojea magnnea vorvim hanv mhojem lagxil’leponn bhasaytam. Ani Jezuchim bhuzvonnechim utram hanv portun udgartam: “Kalljidar zayat, Hanvem sonvsaracher zoyt vhelem” (Ju. 16:33).

“Tumche modem zalam toxem, Devachem Utor suddsuddit porgott zayt vochum ani lok tem manun gheum” (2 Thes. 3:1): Hem Bhavarthachem Voros Somya Krista koddem amchem natem, choddan-chodd mozbut korum, mhonn Benedict XVI vinoyta. “Karonn Tachech vorvim, khorea ani togtolea mogachi khatri ani fuddar pollovpachi nixchitay (certitude) asa.” (Porta Fidei, 15). Hea vorsa Vixv-Dhorm-Porgottnnechea disak, hi mhoji khuxi. Hanv monapasun dhorm-porgottnnarank ani sonvsarachea sogllea konxanim Bori Khobor porgottunk, Povitr Sobheche mukh’khi nixttek adar ani sangat ditolea soglleank axirvad ditam ani ami, Bore Khobreche munnyari ani dhorm-porgottnnar, “Xubh-Vortoman porgottnnecho somadhani ani khoxyecho anond onnbhovtoleanv.

Vatikan, 19 May 2013, Povitr-Atmeachea Yenneachi Porob.